Toy for China: గ్లోబల్‌ టాయ్‌ మేజర్‌లు చైనా నుండి భారతదేశం వైపు దృష్టి సారిస్తున్నాయి. ఈ పరిణామం బొమ్మల తయారీలో చైనాకు ఎంత నష్టమో అది భారత్‌కు లాభంగా మారనుంది. భారతదేశపు బొమ్మల పరిశ్రమ 2015 -2023 మధ్య వేగవంతమైన పురోగతిని సాధించింది. ఎగుమతులు 239 శాతం పెరిగాయి. అదే సమయంలో దిగుమతులు 52శాతం తగ్గాయి, ఫలితంగా బొమ్మల తయారీలో దేశం నికర ఎగుమతిదారుగా మారింది. భారతదేశంలో బొమ్మల విక్రయానికి బ్యూరో ఆఫ్‌ ఇండియన్‌ స్టాండర్డ్స్‌ (బిఐఎస్‌) ఆమోదం తప్పనిసరి.
రక్షణవాదం, చైనా-ప్లస్‌-వన్‌ వ్యూహం, ప్రాథమిక కస్టమ్స్‌ సుంకాన్ని 70 శాతానికి పెంచడం భారతదేశ బొమ్మల పరిశ్రమలో విజృంభణకు దారితీశాయి. ఇండస్ట్రీ ప్లేయర్ల ప్రకారం, #హస్బ్రో, మాట్టెల్‌, స్పిన్‌ మాస్టర్‌, ఎర్లీ లెర్నింగ్‌ సెంటర్‌ వంటి గ్లోబల్‌ బ్రాండ్‌లు మనదేశంపై ఎక్కువగా ఆధారపడుతుండగా, ఇటాలియన్‌ మేజర్‌ డ్రీమ్‌ ప్లాస్ట్‌, మైక్రోప్లాస్ట్‌, ఇంకాస్‌ వంటి ప్రధాన తయారీదారులు క్రమంగా చైనా నుండి భారతదేశం వైపు దృష్టి సారిస్తున్నారు. బిఐఎస్‌ నియంత్రణకు ముందు, బొమ్మల కోసం చైనాపై భారతదేశం 80 శాతం ఆధారపడేది. ఇప్పుడు అది గణనీయంగా తగ్గింది.
టైర్‌ మేకర్‌ ఎంఆర్‌ఎఫ్‌ అసోసియేట్స్‌ యాజమాన్యంలోని చెన్నైకి చెందిన ఫన్‌స్కూల్‌ చీఫ్‌ ఎగ్జిక్యూటివ్‌ ఆఫీసర్‌ జెశ్వంత్‌. హస్బ్రో, స్పిన్‌ మాస్టర్‌, ఎర్లీ లెర్నింగ్‌ సెంటర్‌, ప్లెnయిర్‌, డ్రూమండ్‌ పార్క్‌ గేమ్స్‌ వంటి అంతర్జాతీయ టాయ్‌ మేజర్‌లకు కూడా కంపెనీ సరఫరా చేస్తుంది. కంపెనీ ఉత్పత్తిలో దాదాపు 60 శాతం ఇప్పుడు యూరప్‌, జీసీసీలోని 33 దేశాలకు ఎగుమతి అవుతోంది. బిఐఎస్‌ వంటి ప్రభుత్వ విధాన మద్దతుతో ఇది త్వరలో 40 దేశాలకు విస్తరిస్తుందని జెశ్వంత్‌ చెప్పారు.
”భారతీయ ఉత్పత్తి పెరిగింది. చాలా మంది భారతదేశంలో తమ స్థావరాన్ని ఏర్పాటు చేసుకున్నారు. చైనా నుండి సోర్సింగ్‌ చేసిన చాలా మంది కొనుగోలుదారులు ఇతర దేశాలకు మారడానికి ప్రయత్నిస్తున్నారు. వాటిలో భారతదేశం ఒకటి. ఇందులో మైక్రోప్లాస్ట్‌, డ్రీమ్‌ ప్లాస్ట్‌, ఇంకాస్‌ వంటి కంపెనీలు ఈ జాబితాలో ఉన్నాయి” అని ఢిల్లిdకి చెందిన పంపిణీదారు ఆర్‌పీ అసోసియేట్స్‌ యజమాని పవన్‌ గుప్తా తెలిపారు. #హస్బ్రో, మాట్టెల్‌ వంటి కంపెనీలు కూడా భారతదేశం నుండి పెద్ద ఎత్తున సోర్సింగ్‌ చేస్తున్నాయని గుప్తా వివరించారు.
బిఐఎస్‌ ధ్రువీకరణ లేని బొమ్మలపై జనవరి 1, 2021న అమ్మకాలను భారతదేశం నిషేధించింది. దేశీయ పరిశ్రమకు మద్దతుగా ప్రభుత్వం ఫిబ్రవరి 2020లో బొమ్మలపై ప్రాథమిక కస్టమ్స్‌ సుంకాన్ని 20 శాతం నుండి 60 శాతానికి పెంచింది. ఇది మార్చి 2023లో 70 శాతానికి పెరిగింది. సూక్ష్మ, చిన్న, మధ్య తరహా పరిశ్రమలకు మద్దతు ఇవ్వడానికి బిఐఎస్‌ నిబంధనలను మరింత సడలించాల్సిన అవసరం ఉందని టాయ్‌ అసోసియేషన్‌ ఆఫ్‌ ఇండియా (టిఎఐ) అభిప్రాయపడింది.
దేశంలోని 6,000 బేసి బొమ్మల తయారీ యూనిట్లలో, 1,500 మాత్రమే బిఐఎస్‌ లైసెన్స్‌ పొందాయని అసోసియేషన్‌ తెలిపింది. ఎంఎస్‌ఎంఈ రంగంలో, ప్రభుత్వం గత రెండేళ్లలో చాలా నిబంధనల్ని సడలించింది. గుజరాత్‌ వేగంగా బొమ్మల తయారీ కేంద్రంగా మారుతోంది. అని టిఎఐ అధ్యక్షుడు అజయ్‌ అగర్వాల్‌ అన్నారు. 2023లో భారతదేశంలో బొమ్మల పరిశ్రమ విలువ 1.7 బిలియన్‌ డాలర్లు. 2032 నాటికి 4.4 బిలియన్‌ డాలర్లకు చేరుతుందని అంచనా.
- భారత్‌లో పెట్టుబడులకు స్విస్‌ ఆసక్తి
విదేశీ పెట్టుబడులకు స్వర్గధామంగా మారుతున్న భారతదేశంపై స్విస్‌ కూడా కన్నేసింది. భారత్‌లో పెట్టుబడులకు అనుకూల వాతావరణం ఉండటమే ఇందుకు కారణం. ప్రముఖ చాక్లెట్‌ తయారీ సంస్థ బారీ క్యాలిబాట్‌, టెక్‌ సంస్థ బుహ్లర్‌ సహా స్విట్జర్లాండ్‌కు చెందిన అనేక సంస్థలు భారతదేశంలో పెట్టుబడులు పెట్టడానికి సిద్ధమవుతున్నాయి. ఈ విషయాన్ని ఆ దేశ వ్యవహారాల సెక్రటరీ హెలెన్‌ బడ్గిగర్‌ తెలిపారు.
హెస్‌గ్రీన్‌ మొబిలిటీ 2025 నాటికి భారత్‌లో 3000 విద్యుత్‌ బస్సులను తయారు చేసే యోచనలో ఉన్నట్లు వెల్లడించారు. ఇందుకోసం వచ్చే 6-8 ఏళ్లలో 110 బిలియన్‌ డాలర్ల పెట్టుబడి పెట్టేందుకు సిద్దంగా ఉందని చెప్పారు. బారీ క్యాలిబాట్‌ తన మూడో తయారీ కేంద్రాన్ని భారత్‌లో 2024లోనే ప్రారంభించడానికి ప్రణాళికలు రూపొందించిందని బడ్లిగర్‌ తెలిపారు.
మరొకవైపు భారత్‌లో కార్యకలాపాలు ప్రారంభించి 30 ఏళ్లు నిండిన సందర్భంగా వచ్చే 2-3 ఏళ్లలో బుహ్లర్‌ 23 మిలియన్‌ డాలర్ల పెట్టుబడులకు రెడీగా ఉన్నదని కూడా తెలిపారు. వీటితోపాటు అనేక చిన్న కంపెనీలు భారత్‌వైపు చూస్తున్నాయని చెప్పారు. రవాణా, రైల్వే, ప్రెసిషన్‌ ఇండస్త్రీస్‌, ఆటోమేషన్‌ వంటి రంగాలలో ఇరుదేశాల మధ్య వ్యాపారానికి మెరుగైన అవకాశాలు ఉన్నాయని బడ్లిగర్‌ తెలిపారు. ఈ పరిశ్రమలో నాణ్యమైన ఉత్పత్తులు అందించడానికి స్విస్‌ కంపెనీలు ఆసక్తిగా ఉన్నాయన్నారు.
భారత్‌-ఐరోపా స్వేచ్ఛా వాణిజ్య సంఘం (ఈఎఫ్‌టీఏ) మధ్య ఒప్పందం కుదిరిన నేపథ్యంలో రాబోయే 15 ఏళ్లలో మన దేశానికి 8.3 లక్షల కోట్ల పెట్టుబడులకు హామీ లబించింది. ఇందువల్ల 10 లక్షలకు పైగా ఉద్యోగాలు లభించనున్నాయి. ఈఎఫ్‌టీఏలో స్విట్జర్లాండ్‌, ఐస్‌లాండ్‌, లిక్టన్‌స్టైన్‌, నార్వే సభ్యదేశాలుగా ఉన్నాయి. ఈ ఒప్పందంతో స్విట్జర్లాండ్‌ వాచీలు, కట్‌ అండ్‌ పాలిష్డ్‌ వజ్రాలు, చాక్లెట్లు, బిస్కెట్లు, గోడ గడియారాలు వంటివి తక్కువ ధరకే లభించే అవకాశం ఉంది.
- గేమింగ్‌ ప్లాట్‌ఫారమ్‌లోకి లింక్డ్‌ఇన్‌ !
నెట్‌ప్లిnక్స్‌ వంటి ప్రధాన స్రవంతి ఇంటర్నెట్‌, స్ట్రీమింగ్‌ ప్లాట్‌ఫారమ్‌లు గేమింగ్‌వైపు దృష్టిసారి స్తున్నందున, మైక్రోసాప్ట్‌n యాజమాన్యంలోని ప్రొఫెషనల్‌ నెట్‌వర్కింగ్‌ కంపెనీ లింక్డ్‌ఇన్‌ కూడా ఈ మార్కెట్లోకి ప్రవేశించాలని యోచిస్తోంది. ఇప్పుడు 1 బిలియన్‌ కంటే ఎక్కువ మంది వినియోగదారులను కలిగి ఉన్న లింక్డ్‌ఇన్‌, కొత్త గేమ్‌ల కోసం పనిచేస్తోందని టెక్‌ క్రంచ్‌ నివేదించింది.
ప్రారంభ ప్రయత్నాలలో భాగంగా ”క్వీన్స్‌”, ”ఇన్ఫరెన్స్‌” ”క్రాస్‌్లకంబ్‌” అనే మూడు గేమ్‌లపై వారు పనిచేస్తున్నారని కంపెనీ ప్రతినిధి ఒరపు ధృవీకరించారు. ఇవి ఎప్పుడు రిలీజ్‌ అవుతాయన్న సంగతి మాత్రం వెల్లడికాలేదు. మేము కొంత వినోదాన్ని అన్‌లాక్‌ చేయడానికి, సంబంధాలను మరింతగా పెంచుకోవడానికి, సంభాషణలకు అవకాశం కల్పించడానికి లింక్డ్‌ఇన్‌ అనుభవంలో పజిల్‌-ఆధారిత గేమ్‌లను రూపొందిస్తున్నట్లు సదరు ప్రతినిధి ఒక ప్రకటనలో తెలిపారు.
కాగా, లింక్డ్‌ఇన్‌ గేమింగ్‌లో ప్రయోగాలు చేస్తున్నట్లు కనిపిస్తోందని యాప్‌ పరిశోధకురాలు నిమా ఓవ్జిd చెప్పారు. మైక్రోసాప్ట్‌n గేమింగ్‌ వ్యాపారంలో ఎక్స్‌బాక్స్‌, యాక్టివిజన్‌ బ్లిజార్డ్‌ ఉన్నాయి. గత త్రైమాసికంలో మైక్రోసాఫ్ట్‌ గేమింగ్‌ ద్వారా 7.1 బిలియన్‌ డాలర్ల ఆదాయాన్ని ఆర్జించింది. అక్టోబర్‌ 13, 2023న గేమింగ్‌ కంపెనీ యాక్టివిజన్‌ బ్లిజార్డ్‌ కొనుగోలును పూర్తి చేసింది. గత త్రైమాసికంలో, ఎక్స్‌బాక్స్‌ కంటెంట్‌, సేవల ఆదాయం 61 శాతం పెరిగింది.
